Познато е дека американската брза храна не е популарна меѓу Италијанците, но McDonald’s се погрижи да им докаже дека сепак им се допаѓа.
Ширум Италија има многу ресторани на McDonald’s, но најмногу ги посетуваат туристи или локални тинејџери (кои сѐ уште не знаат што е добро). Италијанците кога веќе јадат брза храна, ја претпочитаат нивната локална, како парче пица или лазања, панини, пјадини и други сендвичи и печива.
Затоа McDonald’s се погрижи да им покаже дека неправедно го дискриминираат. Одлучи да отвори ресторан на нова локација, но без никаде да стави било како знак дека е McDonald’s. Така, во центарот на Милано никна ресторан за брза храна со за никој познато име Single Burger, а кога локалците дојдоа да ги пробаат „непознатите“ бургери, добија типични McDonald’s бургери, само без никаква ознака и во различно послужување и амбиент.
И беа воодушевени. Некои дури и коментираа дека „се поубави од McDonald’s“.
Нормално, McDonald’s потоа им откри што јадат. И тоа го направи три дена по отворањето, откако местото веќе го препралија стотици гладни Италчијанци. Посетителите кои се затекнаа во ресторанот во моментот на големото откритие, зачудено гледаа што се случува.
И покрај одличниот маркетиншки трик, тешко веројатно дека стереотипите кај Италијанците за американската брза храна ќе се променат, барем не во блиска иднина.
