Иако сите видови вежби се ефикасни во контролата на крвниот притисок, истражувањата покажаа дека најкорисна вежба е чучњеви на ѕид.
Ново истражување покажа дека не мора енергично да вежбате за да го подобрите крвниот притисок, што е добра вест за секој што не сака да крева тегови или да трча. Метаанализа објавена во British Journal of Sports Medicine покажа дека статичките изометриски вежби, или вежби во кои ги активирате мускулите без движење, може да бидат поефикасни од другите методи на тренинг кога станува збор за намалување на крвниот притисок.
Научниците анализирале 270 клинички испитувања кои ги документирале ефектите од вежбањето кое трае две или повеќе недели врз крвниот притисок во мирување. Тим од Универзитетот „Крајст Чрч“ во Кантербери открил дека изометриските вежби се покорисни за подобрување и на систолниот и на дијастолниот крвен притисок во споредба со кардиоваскуларните вежби, тренингот за сила и интервалниот тренинг со висок интензитет.
Три вида изометриски вежби беа конкретно проучени, а чучњевите на ѕид се покажаа како најсоодветна вежба.
„Веруваме дека ова може да се должи на поголемата мускулна маса што се користи при изведување на чучњеви на ѕид во споредба со другите изометриски методи на тренинг“, изјави д-р Џејми О'Дрискол за Verywell Health.
Покрај тоа, аеробните вежби и динамичкиот тренинг со отпор се истакнати како корисни за намалување на крвниот притисок. Д-р Роберт Рос истакна дека истражувањето е охрабрувачко за луѓето кои сакаат да го намалат или контролираат крвниот притисок преку вежбање.
„Ако некој сака да го намали крвниот притисок и тоа го мотивира да вежба, тогаш добрата вест е дека изометриските вежби, тренингот за сила и класичните аеробни вежби се поврзани со намалување на систолниот и дијастолниот крвен притисок“, рече Рос.
За разлика од трчањето, пливањето или тренингот со тегови, изометриските вежби се практични, ефикасно искористување на времето и не бараат опрема за вежбање. Како што објаснува Рос, ако немате 150 минути неделно умерена до интензивна физичка активност, би било корисно да изведувате едноставни вежби кои имаат ефект врз здравјето.
