Со години, ентузијастите за фитнес се фокусираа главно на кардио вежби. Иако кардио вежбите и натаму се одличен избор за одржување на форма, неодамнешните истражувања покажуваат дека додавањето тренинг за сила е клучно за долгорочно здравје и сила.
Иако вклучувањето на тегови во вашата дневна рутина бара одредено планирање - особено за почетници - студијата сугерира дека тренингот за сила може значително да ја намали биолошката возраст на телото, дополнително нагласувајќи ја важноста на овој вид физичка активност.
Студија објавена во списанието Biology ги анализираше ефектите од тренингот за сила врз процесот на стареење кај речиси 5.000 мажи и жени на возраст од 20 до 69 години.
Резултатите покажаа дека 90 минути тренинг за сила неделно се поврзани со намалување на биолошката возраст за речиси 4 години. За оние што тренирале 180 минути неделно, биолошката возраст на телото била помала за дури 8 години.
Овие наоди се целосно во согласност со тековните здравствени препораки. Упатствата за физичка активност на САД им советуваат на возрасните да прават најмалку 150 минути умерена активност неделно, со најмалку два дена посветени на тренинг за сила.
Објаснувајќи ја врската помеѓу стареењето и тренингот, истражувачите наведуваат дека тренингот за сила ја ублажува штетата предизвикана од хронични болести, го забавува губењето на мускулната маса, го забрзува метаболизмот во мирување, го стимулира согорувањето на мастите и го подобрува кардиоваскуларното здравје. Сето тоа директно го забавува стареењето на клетките.
Едноставно кажано: тренингот за сила ве прави биолошки помлади.
Д-р Алберт Матени во изјава за Women's Health предупредува да се биде внимателен при толкувањето на резултатите, забележувајќи дека учесниците сами го пријавиле својот обем на тренинг, што остава простор за субјективност. Студијата, исто така, не следела специфичен протокол за кревање тегови. Сепак, основната порака е јасна - повеќе тренинг за сила е поврзан со подолги теломери.
„Повеќе часови тренинг се директно поврзани со подолги теломери“, вели Матени.
За луѓето што никогаш не кревале тегови, започнувањето може да изгледа застрашувачки. Сепак, Матени нагласува дека не е потребна опрема за да се започне.
Препорачува да се фокусирате на големи мускулни групи, како што се нозете. Тие вклучуваат вежби како чучњеви, исчекори и качување по скали. За горниот дел од телото предлага склекови и згибови.
Како што напредувате, можете да го зголемите интензитетот со повеќе повторувања, користење поголеми тежини или користење ленти за отпор.
