Моментите на чести раскинувања и помирувања во врската многумина ги наведуваат да се прашаат дали се работи за силна љубов или за токсична врска.
Во свет каде модерните жени ги балансираат кариерата, семејството, финансиите, здравјето и многу други очекувања, врските може да изгледаат како „хаотично парче од сложувалката“. Сето ова води до бројни емоционални подеми и падови кои се многу исцрпувачки и водат до анксиозност.
Според експертката Анкита Каул, иако сѐ повеќе жени стануваат свесни за своите потреби и ги напуштаат нездравите врски, сепак тие се во малцинство. Она што многу жени ги тера да размислуваат е помислата на причините зошто тоа се случува.
Имено, една од причините е стравот од непознатото, како и помислата на осаменост. Плус, запознавањето со некој нов може да биде непредвидлив чекор што го прави останувањето со некој што го познаваме да изгледа како побезбедна опција, дури и кога тоа не е идеално.
Кога вложувате многу емоции во некого, пуштањето може да ви изгледа како да кинете дел од себе. Стравот од разделба, особено од некој кој не се однесува како што заслужувате, може да ве држи во врска подолго отколку што треба.
Многу жени остануваат во незадоволителни врски затоа што веруваат дека не заслужуваат подобро. Стравот да не најдат некој друг или мислата дека она што го имаат е најдоброто што можат да го добијат, често ги наведува да се држат за нешто што не им носи среќа.
Верувањето дека некој ќе се промени е една од најопасните илузии во љубовта затоа што жените често остануваат со некого поради својот потенцијал, а не она што тој моментално е. Исто така. хаосот на врската може да стане необично утешен кога ќе стане познат. Со текот на времето, дисфункционалните обрасци стануваат нормални, па дури и токсичната врска може да почне да се доживува како „пријатна“.
За да излезете од „маѓепсаниот круг“ на постојани раскинувања и помирувања, препорачливо е прво да размислите што ви треба и што сакате. Ова значи да работите на емоционална и финансиска независност, како и да ја разберете вашата вредност.
