Предизвиците се составен дел од секоја врска, но понекогаш се појавуваат знаци кои можат да укажуваат на подлабоки проблеми и недостаток на надеж за заедничка иднина.
Некои од овие знаци може да се видат во раните фази, а нивното препознавање може да им помогне на партнерите да побараат помош или навремено да донесат важни одлуки. Знаците што е важно да се препознаат навремено ги истакна брачната и семејна терапевтка, Ешли Сајгер.
„Кога ниту еден партнер не е подготвен да вложи труд и да работи на проблемите во врската, шансите врската да преживее се многу помали. Врска во која нема подготвеност за промена, компромис и заеднички напредок тешко може да ги издржи секојдневните предизвици. Без взаемна мотивација и подготвеност за инвестирање, партнерите се оддалечуваат и го губат чувството на заедништво“, изјави Сајгер за YourTango.
Ако комуникацијата меѓу партнерите е исполнета со презир, без разлика дали е вербална или невербална, тоа е знак на длабоки несогласувања и нерешени емоции.
„Презирот може да се изрази преку иронични коментари, изрази на лицето, гестови или едноставно ладен тон. Овој начин на комуникација укажува дека врската е оштетена, а партнерите не се чувствуваат рамноправни или почитувани“, тврди Сајгер.
Дополнително, кога еден или двајцата партнери чувствуваат огорченост или фрустрација еден кон друг, тоа станува пречка за вистинска интимност и простување.
„Огорченоста често се манифестира преку сарказам, молчење, повлекување или ситни провокации. Со текот на времето, чувството на фрустрација само расте, што го отежнува секој обид за помирување“, предупредува Сајгер.
Нарушената невербална комуникација, како што се превртување со очи, воздивнување или игнорирање, може целосно да го спречи решавањето на конфликтот. Кога ваквите гестови често се повторуваат, партнерите почнуваат емоционално и физички да се дистанцираат еден од друг.
„Отсуството на позитивна невербална комуникација создава ѕидови меѓу партнерите и дополнително го продлабочува јазот во врската. Ако ги препознаете овие знаци во вашата врска, можеби ќе сакате да разговарате со брачен советник за да пронајдете пат кон решение, разбирање и љубов“, тврди терапевтката.
