Интересен оглас осамна на веб-страницата на Агенцијата за вработување и тоа од фудбалски клуб кој бара фудбалер.
Есенскиот дел во македонскиот фудбал заврши. Всушност, има да се одигра уште еден одложен натпревар в петок. За тетовскиот второлигаш Тетекс паузата официјално започна, а започнаа и плановите за засилувања.
Од вторникот на веб-страницата на Агенцијата за вработување стои оглас на кој Тетекс вработува фудбалер на неопределено време со плата од 24.400 денари, односно минимална според законот.
Во денешна објава на Facebook од Тетекс потврдија дека се во процес на „ангажирање нови играчи кои ќе го засилат тимот“.
Тетекс сезонава се бори за опстанок во втората лига, откако по една сезона мината меѓу третолигашите експресно се врати. На полусезона има освоено 17 бодови и е на 11-тото место, кое води во бараж за испаѓање. Сезонава втората лига се крати и дури пет клубови ќе испаднат директно, а три ќе играат бараж.
Сите заинтересирани можат да се пријават, но побрзајте оти огласот завршува денеска (четврток).
