Кајганата се подготвува релативно лесно, поради што е омилен избор на многумина за појадок – особено затоа што утрото обично немаме многу време за подготовка на комплицирани јадења.
Сепак, постои една честа грешка што многумина ја прават при подготовка на кајгана, а тоа е додавањето на една популарна намирница која, според зборовите на кулинарските експерти, не припаѓа таму.
Станува збор за млеко. Имено, многу луѓе имаат навика откако ќе ги изматат јајцата, во нив да додаваат млеко, верувајќи дека така ќе го подобрат вкусот и ќе ја направат кајганата кремаста. Според зборовите на Роби Мелвин, автор на кулинарски текстови за магазинот Southern Living, млекото во кајганата всушност прави само едно: го прикрива вкусот на јајцата.
Ако сте купиле квалитетни јајца, не ви треба ништо што ќе го „изеде“ нивниот природен вкус. Во случај да сакате сепак кремаста кајгана, Мелвин препорачува да ја подготвувате на путер. Неговиот совет е и да не ги матите јајцата директно во тавата, туку во некој друг сад, од каде што ќе ги истурите во добро загреана тава.
Кајганата, вообичаено, не се пржи долго – туку по најмногу една минута се трга од шпоретот. За време на готвењето, јајцата се мешаат со спатула за да бидат добро термички обработени, но не и прегорени. Кога ќе бидат готови, може да се стави сол и бибер по желба и да се послужат на чинија или парче леб.
