Ароматичен сос и меко пилешко месо од рерна - вистинска гозба од една тава.
Кога пилешкото се маринира со добри зачини, вино и кромид, нема грешка - месото е меко, сочно, ги апсорбира сите вкусови и едноставно се топи во устата. Овој рецепт е совршен за секој што сака домашна, но малку „засилена“ кујна - со едноставни состојки добивате јадење што го собира целото семејство околу масата. Најубавото е што сè оди во една тава, така што нема многу валкани садови, а вкусот е како од најдобриот ресторан. Идеално за неделен ручек, прослава или кога сакате малку да се почастите.
Колку подолго го маринирате месото, толку помек и пополн ќе биде вкусот - ако имате време, оставете го преку ноќ.
Потребни состојки:
- пилешко месо (батаци, стекови или крилца)
за маринадата:
- сол
- бибер
- коријандер
- мајчина душица
- 3-4 кромиди
- лук (по вкус)
- рузмарин (свеж или сушен)
- маслиново масло
- суво бело вино
за основата од зеленчук:
- 2 кромида
- 1 голем морков
- 250 мл зовриена вода
- сол
- бибер
- ловоров лист
- 1 лук
- свеж магдонос
Подготовка:
Во голем сад измешајте сол, бибер, коријандер, мајчина душица и рузмарин. Додадете маслиново масло, суво бело вино, 3-4 главици кромид сечкан на кругови и лук по вкус. На крај, додадете го пилешкото месо и добро протријте го со маринадата. Покријте го садот и оставете го во фрижидер најмалку 2 часа, по можност преку ноќ.
Во длабок сад или тава со капак, пржете го ситно исечканиот кромид (2 главици), додадете го морковот исечен на прстени или стапчиња. Додадете ситно сечкан лук. Крчкајте 5-10 минути во малку масло додека сè не омекне. Во 250 мл вода додадете сол, бибер и еден или два листа ловор. Оставете да зоврие, па прелијте го зеленчукот. Додадете малку свеж магдонос.
Во огноотпорен сад, или тава за печење, наредете го маринираното месо врз зеленчукот, заедно со кромидот од маринадата. Печете сè заедно во претходно загреана рерна на 200°C околу 45 минути до 1 час, додека месото не добие златнокафена боја, а сокот не се згусне во прекрасен сос.
