Оваа сладолед торта со бисквити освојува на секој залак, па затоа ќе барате репете.
Торта со сладолед е идеална за топлите летни денови или за секоја посебна пригода. Комбинирајќи ја кремастата текстура на сладоледот со различни додатоци како овошје, чоколадо или бисквити, оваа торта освојува со првиот залак и никого не остава рамнодушен. Подготовката е едноставна, а резултатот е вистинско уживање за целото семејство.
Ако сакате дополнителен шмек, можете лесно да ги навлажнете бисквитите со сок од портокал, млеко или кафе пред да ги редите еден врз друг.
Состојки:
- 400 мл млеко
- кора од 1 лимон
- 1 лажичка ванилин шеќер
- 1 стапче цимет
- 2 јајца
- 30 гр шеќер
- 20 гр пченкарен скроб
- сок од 1 лимон
- 80 гр кондензирано млеко
- 100 мл шлаг
- чоколадни бисквити
- 1 лажичка какао
- 50 гр чоколадо (за глазура)
- малку топол крем (од подготвениот)
- мелени ореви (за декорација)
Подготовка:
Истурете го млекото во тенџере, додадете ја кората од лимон, ванилиниот шеќер и стапчето цимет. Ставете го на шпорет да се загрее, но не дозволувајте да зоврие.
Во посебен сад, изматете ги жолчките со шеќерот и пченкарниот скроб додека не се добие пена. Кога млекото ќе почне да врие, отстранете ја кората и циметот, а потоа полека истурете го топлото млеко во изматените жолчки, мешајќи постојано. Вратете сè на шпоретот и гответе на тивок оган додека не се згусне. Тргнете од оган, додадете го сокот од лимон и кондензираното млеко, добро промешајте и оставете да се олади. Изматете ги белките одделно додека не се стврднат, а во друг сад изматете го шлагот. Нежно измешајте ги двете смеси со изладениот крем.
Земете помал калап, покријте го со проѕирна фолија и почнете да го составувате: прво истурете ја половината од филот, измешајте го какаото во другата половина, истурете го одозгора и на крај додадете ги бисквитите. Ставете го колачот во замрзнувач најмалку 2 часа. Кога целосно ќе се стегне, извадете го од калапот така што бисквитите ќе бидат долниот слој. Растопете го чоколадото, измешајте го со малку топол крем, потоа прелијте го колачот и наросете со мелени ореви.
