Направете посна паста болоњезе која ќе ги воодушеви дури и најголемите љубители на месо. Заменете го месото со црвена леќа и ореви.
Болоњезе е едно од најпознатите јадења во италијанската кујна, познато по својот богат вкус и ароматичен доматен сос кој совршено оди со тестенини.
Во посни и вегански верзии, овој класик може да биде подеднакво вкусен, благодарение на внимателно одбраните состојки кои му даваат полност и текстура на јадењето.
Комбинацијата од црвена леќа и ситно сечкани ореви му дава на сосот богат вкус и хранлива вредност, додека зеленчукот и зачините ја создаваат препознатливата арома на традиционалното болоњезе. Ова е совршен избор за секој што бара лесен, но заситувачки оброк без месо.
Потребни состојки:
- 2–3 лажици масло
- 1 голема главица кромид
- 2 моркова
- 100 гр целер
- сол
- бибер
- оригано
- магдонос
- босилок
- 1 лажичка доматно пире
- 2 чешниња лук
- 150 гр црвена леќа
- 50 гр ореви
- 400 гр конзервирани домати
- 200 мл доматно пире
- 200 мл вода
- 1 лажичка балсамико оцет
- 400 гр тестенини по ваш избор
Подготовка:
Во голем сад загрејте го маслото на средна температура. Додадете ги ситно исечканите кромид, морков и целер, па пржете неколку минути додека зеленчукот не омекне. Додадете ги зачините, малку сол и бибер и продолжете кратко да пржите за да се ослободи аромата од зеленчукот.
Додадете доматна паста и ситно сечкан лук во смесата и кратко пржете сè заедно константно мешајќи. Додадете ја исцедената леќа (претходно натопена во вода) и ситно сечканите ореви, потоа додадете ги конзервираните домати исечкани на коцки, доматното пире и водата.
За поинтензивен вкус и мирис, додадете малку црвено вино или зеленчукова супа додека сосот крчка.
Откако сосот ќе почне да врие, намалете ја температурата и варете на тивок оган околу 30 минути, додека леќата целосно не се свари. Додадете малку повеќе вода доколку е потребно за време на готвењето ако сосот стане премногу густ. На крај, додадете го балсамико оцетот. Пробајте го сосот и по потреба зачинете со уште сол и бибер.
Во меѓувреме, варете ги тестенините во солена вода според упатствата на пакувањето, додека не станат ал денте.
Исцедете ги тестенините и послужете ги со богат сос од леќа и ореви. По желба, наросете со свежи билки.
