Во пресрет на 78. издание на Канскиот филмски фестивал, организаторите воведоа нови, построги модни правила на црвениот тепих, со посебен акцент на забраната за „голи“ фустани и провокативни облеки.
Целта на оваа забрана е враќање на класичната елеганција и достоинството на еден од најпрестижните филмски настани во светот.
Иако Кан отсекогаш бил сцена каде модата и уметноста се преплетуваат, последниве години се појавија критики заради се поексплицитните и разголени изданија на славните личности. Со новите насоки, организаторите јасно порачуваат дека голотијата и екстремната провокација повеќе нема да бидат дел од фестивалскиот дрес-код. Гостите се повикуваат да избираат вечерни тоалети и костуми што ја почитуваат традицијата на фестивалот, а секое прекршување на правилата може да резултира со одбивање на влез на црвениот тепих.
Оваа промена е дел од поширок тренд на враќање кон софистицираноста и индивидуалноста во модата, што веќе беше забележано на други големи настани годинава. Канскиот фестивал, како симбол на гламур и филмска уметност, со оваа забрана испраќа порака дека стилот, креативноста и почитта кон традицијата се приоритет, а не провокацијата по секоја цена.
Во последните години, црвениот тепих на големите светски настани како Оскарите, Met Gala и BAFTA стана вистинска модна писта, каде што славните личности ги презентираат најновите трендови и најхрабрите модни изрази. Но, годинава, во фокусот на модните коментари се најде изненадувачкиот недостаток на „голи“ фустани – тренд кој последната деценија доминираше на црвените теписи ширум светот.
Ако минатите години беа обележани со провидни, голи и исклучително разголени креации, 2025 година донесе пресврт. На Оскарите, Met Gala и BAFTA, наместо голи фустани, доминираа класични, софистицирани и често скулптурални модели. На Оскарите, на пример, најголем тренд беа „nude and sparkly“ фустаните, но во многу поелегантна и суптилна варијанта – со богати детали, кристали и бисери, но со поголема покриеност и нагласена женственост. Актерките како Аријана Гранде и Селена Гомес блескаа во креации со илјадници кристали, но без провидноста и екстремната разголеност што ја гледавме претходните сезони.
На BAFTA наградите во Лондон, модните критичари забележаа дека доминираат фустани со сложени текстури, асиметрични кроеви и драматични детали – но без екстремно разголени елементи. Анна Максвел Мартин се појави во црн фустан со волуменозни детали и пеплум, додека Николa Кофлан носеше комбинација од чипка и цветен топ, а Мариса Абела избра корсет и драпирана сукња во длабока слива боја. Дури и најсмелите изгледи, како оној на Били Пајпер со пинк фустан и мини-сукња, беа повеќе инспирирани од панк и авангарда, отколку од провидна голотија.
Модните куќи и дизајнерите, според Vogue и Harper’s Bazaar, годинава го истакнаа кројот, индивидуалноста и инспирацијата од машката облека. На Met Gala, каде темата беше „Tailored for You“, доминираа костуми, мантили и фустани инспирирани од класичен машки крој, со акцент на црни и темни тонови, текстури и детали кои ја слават црната култура и историја. Меѓу најзабележителните изгледи беа оние на Тејана Тејлор со пин-стрaјп костум и драматичен плашт, како и Ема Чемберлен во дизајн инспириран од машки костум со откриени детали на грбот.
Оваа промена не е случајна. Модните експерти сметаат дека по долг период на провокација и екстремна разголеност, индустријата и публиката бараат нови вредности – софистицираност, индивидуалност и уметничка изработка. Дизајнерите се фокусираат на квалитетни материјали, рачна работа и крој, а славните личности сè повеќе избираат изгледи кои ја истакнуваат нивната личност, наместо да шокираат со голотија.
Дури и кога се појавуваат фустани со провидни или „nude“ елементи, тие се реализирани со повеќе вкус и суптилност, со нагласување на деталите и силуетата, а не на експлицитната разголеност. На Оскарите, на пример, Аријана Гранде носеше креација со 190.000 кристали, а Деми Мур и Скарлет Јохансон избраа винтиџ модели со сјајни детали, но со класичен крој и покриеност.
