Носталгијата повторно станува тренд, но во рацете на „Алшар“ таа добива модерен пулс што вибрира во ритамот на синт-попот и неонските светла од осумдесетите.
Со зимската колекција I Want My MTV, дизајнерката Силвија Михајловска не нè враќа во минатото, туку создава мост помеѓу младешката енергија на едно златно време и динамиката на денешницата. Поводот е симболичен – крајот на емитувањето на MTV како културен феномен што ја обликуваше цела генерација. Таа го претвора овој емотивен момент во моден омаж на храбрите силуети, драматичните раменици и заводливата естетика што ги слави индивидуалноста и креативниот бунт. Колекцијата е визуелен приказ на звук, боја и текстура – совршено темпирана ретроспектива на времето кога модата и музиката зборуваа со исто срце.
„На крајот на оваа 2025 година музичкиот канал МТV за жал ќе престане со емитување на програма. Музиката отсекогаш била важен дел од мојот живот, а MTV го обележа моите тинејџерски години во осумедестите. Зимската колекција I Want my MTV на Алшар е посветена токму на овој период од мојот живот и директно е инспирирана од музичките спотови од осумдесетите години, како на пример Depeche Mode, Banananarama, Madonna, Sade, Duran Duran, Spandau Ballet... Самото име на колекцијата е извадено од песната на Dire Straits, a го пее Sting, со чие видео е започнато емитувањето на МТV Europe“, вели дизајнерката зад брендот „Алшар“, Силвија Михајловска.
Колекцијата I Want My MTV е љубовно писмо до модниот дух на осумдесетите, но прераскажано на современ визуелен јазик. Силвија Михајловска мајсторски балансира меѓу препознатливиот гламур на тие години и денешната минималистичка префинетост. Иглата и конецот тука раскажуваат приказна за слобода, индивидуалност и нескротлива женственост што не се плаши од сцена. Црната и цикламата создаваат ударен визуелен дијалог, додека црвената и сивата ги омекнуваат контурите и додаваат зрелост.
Пеперутка-ракавите и нагласените раменици повикуваат на концертна сцена под светлата на рефлекторите, но конструирани се со чувствителност што им дава носливост и софистицираност. Металните детали, кадифето и чипката додаваат допир на еклектична романтика – препознатлив печат на Михајловска. Фотосесијата со Ана Ежова, за која мејкап артист беше Виктор Мирчевски, ја доловува токму таа енергија: жена која звучи како музика и изгледа како икона. I Want My MTV е повеќе од колекција – тоа е визуелна плоча на една генерација што веруваше дека стилот не е само облеката што ја носиме, туку културен амалгам на времето во кое живееме.
