Овој моден водич е сè што ви треба за да изгледате беспрекорно во наредните месеци.
Со децении, сакото зазема почесно место во секоја гардероба - од строга канцелариска класика, преку симболиката на power dressing до незаменливо парче во уличниот стил на модните икони.
Сепак, со доаѓањето на пролетта, строгата форма на сакото добива понежен, порелаксиран карактер, особено кога се комбинира на начин на кој тоа го прават парижанките - со примеси на лежерност и шарм без трошка претенциозност.
Во продолжение ви претставуваме пет стилски трикови кои на секое сако ќе и дадат доза пролетна леснотија, свежина и неодолива софистицираност.
Французинките сакаат класични комбинации кои никогаш не излегуваат од мода. Сако над бела памучна маичка создава совршен баланс помеѓу свеченото и лежерното. Овој контраст дава модерен и свеж изглед, без впечаток на строгост.
Заборавете на строго скроените сакоа. Оваа сезона доминираат моделите со „преголем“ крој, спуштени раменици и подолг крој. Во комбинација со тесни панталони, миди-здолниште или дури и шорцеви, овие сакоа визуелно ја издолжуваат фигурата и изгледаат модерно, но и опуштено.
Ако постои еден моден трик кој никогаш не разочарува, тоа е комбинацијата на сако и класични сини фармерки. Прав крој, малку избледени, во комбинација со сако во пастелни нијанси или беж тонови - резултатот е изглед кој зрачи со свежина и безвременска елеганција.
Малите детали често прават голема разлика. Свилените марами околу вратот, чевлите со ниски потпетици, чантите од кожа во боја на коњак или златниот накит со минималистички дизајн внесуваат топлина и женственост во класичното сако, бришејќи ја секоја трага на строгост.
Французинките знаат колку е важно ткаенината да „раскажува приказна“. Сакоата направени од лен, памук или дури и сатен го прават целокупниот изглед прозрачен и природен, идеален за сончеви денови и вечерни прошетки.
