Францускиот модел Тилан Блондо, која се здоби со глобална слава како дете и често беше нарекувана „најубавото девојче во светот“, соопшти дека се свршила со францускиот актер Бенџамин Атал.
Блондо (24) сподели фотографии од романтично патување во Грција - каде што Атал ѝ предложил брак.
Во описот на објавата, таа напиша: „Му реков 'да' на мојот најдобар пријател. Засекогаш.“
Блондо е родена на 5 април 2001 година во Екс-ан-Прованс, во семејство со силна уметничка и спортска позадина. Нејзиниот татко, Патрик Блондо, беше професионален фудбалер, додека нејзината мајка, Вероника Лубри, е актерка и телевизиска водителка.
Како четиригодишно девојче, Тилан ја започна својата кариера како модел, одејќи на познати дизајнерски ревии, а на само шест години се појави на насловната страница на Vogue Enfants, што ѝ донесе глобално внимание и прекар „најубавото девојче во светот“.
Во тинејџерските години, Тилан ја зацврсти својата кариера како професионален модел потпишувајќи договор со агенцијата IMG Models и работеше за реномирани модни куќи како што се Dolce & Gabbana, Versace, Chanel и Ralph Lauren. Таа стана глобален амбасадор на L’Oréal, приклучувајќи се кон најпознатите светски лица во кампањите на брендот.
Покрај работата како модел, Тилан се обиде и во глумата, дебитирајќи во филмот Belle et Sébastien: l’aventure continue, а на социјалните мрежи се претставува како креаторка на содржини и претприемачка. Таа лансираше свои модни и козметички проекти, вклучувајќи ја линијата за облека Heaven May и брендот за нега на коса Enalyht.
Иако прекарот „најубавото девојче во светот“ сè уште ја следи нејзината кариера, Тилан нагласува дека сака да се дистанцира од перцепцијата дека убавината е нејзина единствена вредност.
