Вирален трик од социјалните мрежи тврди дека тестенините сварени претходниот ден, изладени и потоа подгреани се подобри за шеќерот во крвта отколку тазе зготвените. Експертите велат дека оваа идеја сè уште има одредена поддршка во науката.
Слично е на трикот со замрзнување, а потоа и тост леб: кога ќе изладите скробна храна и потоа повторно ќе ја загреете, дел од скробот се менува така што побавно се распаѓа. Неодамна, познатата готвачка Гјада Де Лаурентис дополнително го „подгреа“ овој тренд, порачувајќи им на своите следбеници дека подгреаните тестенини потешко се варат, пишува New York Post.
Експертите потврдија за Fox News Digital дека тврдењата се поткрепени со истражување. „Кога ги готвите тестенините, ги ладите, а потоа ги загревате во микробранова печка, дел од сварливиот скроб се претвора во она што се нарекува отпорен скроб“, објаснила Ешли Киченс, диететичарка од Северна Каролина.
„Отпорниот скроб, едноставно кажано, потешко се вари. Поради ова, гликозата побавно влегува во крвотокот“, додаде таа. Исто така вели дека се однесува слично како влакната: наместо брзо да се разложи на шеќер, може да послужи како храна за корисни цревни бактерии во дебелото црево.
Отпорниот скроб се произведува со таканаречената ретроградација. Кога тестенините ќе се сварат, скробот станува полесен за варење. По ладење во фрижидер, често по околу 24 часа или повеќе, дел од скробот се „преуредува“ во структура што телото не може целосно да ја разложи.
Поради ова, оладените и повторно подгреани тестенини може да имаат малку помалку енергија што телото може да ја искористи и да предизвикаат помал пораст на шеќерот во крвта после оброк, според нутриционистите од Медицинскиот центар Векснер на Државниот универзитет во Охајо.
Во нивниот текст од 2024 година се наведува дека отпорниот скроб има околу половина калории по грам „обичен“ скроб и поминува во дебелото црево, каде што служи како храна за добрите бактерии.
Истражувањето од Универзитетот во Сари во Англија, исто така, открило понизок шеќер во крвта и помал одговор на инсулин по тестенините кои биле варени, изладени и повторно загреани во споредба со свежо зготвените тестенини - особено ако тестенините биле варени ал денте.
„Тоа не е загарантиран трик, а ефектот варира од личност до личност“, вели Лаури Рајт, вонреден професор на Колеџот за јавно здравје на Универзитетот во Јужна Флорида. „Тоа може да го ублажи порастот на гликозата, но тоа не ги прави тестенините ‘безопасни’ за шеќерот во крвта“, истакна таа.
Овој пристап може да им помогне на оние кои го следат нивниот шеќер во крвта, вклучително и луѓето со дијабетес, но како една алатка, а не како лек. Кај луѓето кои користат инсулин, промената на стапката на пораст на шеќерот може да значи и дека треба да го следите времето (ако е потребно, во консултација со лекарот), забележува Рајт.
„Само дел од скробот се претвора во отпорен скроб“, вели Киченс. „Ако јадете голема порција тестенини, тој ефект лесно се губи. Експертите се согласуваат: повторното загревање на тестенините може да обезбеди мала метаболичка предност, но најважните работи се сепак избалансиран оброк, доволно влакна и контрола на порциите.
