Двете намирници се добри за имунитетот, и дали едната има предност?
На почетокот на настинката, многу луѓе се свртуваат кон природни решенија. Две намирници кои со векови се сметаат за сојузници на здравјето се лукот и ѓумбирот. И двете се познати по својот силен вкус и корисен ефект врз имунолошкиот систем, но дали едната е навистина поефикасна од другата?
Лукот и ѓумбирот не содржат многу калории, но се богати со биоактивни растителни соединенија, пишува Prevention. Најважната состојка во лукот е алицинот, сулфурно соединение кое се ослободува кога чешнето се згмечува или сечка и е познато по своите антибактериски и антивирусни ефекти. Клучната состојка во ѓумбирот е џинџерол, одговорен за неговите антиинфламаторни и антиоксидантни својства.
Истражувањата покажуваат дека лукот може да ја стимулира активноста на белите крвни клетки, кои играат клучна улога во борбата против вирусите. Исто така, има докази дека редовната консумација може да ги ублажи симптомите на настинка и да го скрати нејзиното траење.
Ѓумбирот помага во намалувањето на воспалението и е познато дека ги ублажува гадењето и стомачните тегоби, што индиректно придонесува за појак имунитет. Топлиот чај од ѓумбир често се препорачува кога не се чувствуваме добро, бидејќи го загрева, хидратира и смирува телото.
Лукот може да предизвика непријатен здив и стомачни тегоби, особено ако се јаде сиров и во големи количини. Ѓумбирот во поголеми дози може да предизвика киселини или непријатност во стомакот. Двете намирници имаат благ ефект врз разредувањето на крвта, па затоа се препорачува претпазливост кај луѓето кои користат одредени терапии.
Не мора да избирате помеѓу лук и ѓумбир, бидејќи најдобриот ефект се постигнува со нивната комбинација. Лукот директно ги зајакнува одбранбените клетки, додека ѓумбирот го намалува воспалението и создава поволни услови за силен имунолошки одговор. Со вклучување на двете намирници во исхраната, телото добива поширока и природна поддршка за имунитет.
