Топлото кафе е утрински ритуал за многумина. Сепак, онкологот би сакал секој што не го започнува денот без првата шолја кафе да развие навика што ќе го намали ризикот од развој на рак на хранопроводникот.
Започнувањето на утрото со шолја кафе не е само пријатно, туку носи и бројни придобивки. Меѓутоа, ако го пиете кафето додека е сè уште топло, би можеле да го загрозите вашето здравје.
„Консумирањето топли пијалаци може да ја иритира или оштети слузницата на хранопроводот“, вели за Parade д-р Марк Ашамала, доктор по радиоонкологија.
Ако ова ви се случи еднаш, веројатно ќе почувствувате болка во устата или грлото што ќе помине релативно брзо. Меѓутоа, кога хранопроводот е постојано изложен на многу топли течности, топлината може да предизвика континуирана иритација, воспаление и циклуси на повреда и заздравување. Кога слузницата на хранопроводот станува воспалена, тоа се нарекува езофагитис.
Д-р Ашамала предупредува дека езофагитисот може да предизвика симптоми како што се:
- чувство на печење,
- непријатност во градите,
- болка при голтање,
- тешкотии при голтање,
- чувство дека храната е заглавена.
„Ако повредата е во тек, понекогаш може да доведе до чиреви, крварење, лузни или стеснување на хранопроводот“, објаснува докторот.
Со текот на времето, д-р Ашамала вели дека овој вид термичка повреда може да придонесе за промени во клетките што го обложуваат хранопроводот и е поврзан со зголемен ризик од рак на хранопроводот, особено сквамозен карцином на хранопроводот, еден од најчестите видови рак на хранопроводот.
Д-р Ашамала, повикувајќи се на Меѓународната агенција за истражување на ракот, ги дефинира „многу топлите пијалаци“ како оние над 65 степени Целзиусови. Консумацијата ја класифицира на многу топли пијалаци како „веројатно канцерогени за луѓето“.
Бидејќи веројатно нема да ставате термометар во шолјата за кафе за да ја проверите температурата, докторот предлага да испиете многу мала голтка. Ако ви гори устата или е премногу болно за голтање, тогаш е премногу жешко.
Сепак, иако редовното пиење премногу топли пијалаци може да го зголеми ризикот од рак на хранопроводот, ладните пијалаци се сосем во ред.
„Многу ладните пијалаци понекогаш можат да предизвикаат привремена непријатност, стегање во градите или спазам на хранопроводот кај луѓе со чувствителен хранопровод или основно нарушување на подвижноста. Сепак, не е познато дека ладните пијалаци предизвикуваат ист тип на хронична термичка повреда поврзана со многу топлите пијалаци“, објасни д-р Ашамала.
Ова е само уште една причина да почекате кафето малку да се олади.
Топлото кафе не е единствениот начин на кој хранопроводот може да се воспали и да го зголеми ризикот од рак. Докторот, исто така, ги посочува алкохолот и тутунот како главни фактори на ризик за рак на хранопроводот, особено кога се користат заедно.
