Иако е тешко да се одолее на топлите, крцкави помфрити свежо извадени од фритезата, претерувањето со ова омилено јадење може да има сериозни последици.
Поточно, луѓето што јадат помфрит три пати неделно имаат до 20% поголем ризик од развој на дијабетес тип 2, додека овој ризик се зголемува дополнително кај оние што консумираат пржен компир пет пати неделно.
Сепак, ризикот не се однесува на други начини на подготовка на компири. Варените, печените или пире компири не покажаа негативни ефекти поврзани со пржената верзија, што јасно покажува како методот на подготовка влијае на здравјето.
Исто така, замената на неколку неделни порции компири со интегрални житарици може да придонесе за намалување на ризикот од дијабетес. Ова дополнително ја нагласува важноста на изборот на вистинската храна во вашата дневна исхрана.
За потсетување, денес се слави Светскиот ден на дијабетесот. Воспоставен е во 1991 година како одговор на растечката загриженост за здравствената и економската закана што ја претставува оваа болест, а во 2006 година стана официјален ден на Обединетите нации. Симболот на прославата е синиот круг, знак на единство и глобалната борба против дијабетесот.
