Седењето рамо до рамо со непознати и стискањето со згрчени нозе во малиот простор меѓу седиштата се само дел од причините зошто многу луѓе не сакаат да патуваат со авион.
За среќа, има неколку трикови како да дојдете до идеалното место во авионот за вас, без разлика дали барате удобност, добар поглед или да заштедите пари.
Сигурно сте слушнале дека патувањето со авион е еден од најбезбедните начини за патување. Ако сепак сакате дополнително да ја зголемите вашата сигурност, имајте на ум дека едно истражување од 2007 година покажа дека најбезбедни се седиштата што се наоѓаат во задниот дел на авионот. Патниците кои седат назад имаат 40% поголеми шанси да преживеат авионска несреќа во споредба со оние кои седат во првите редови.
Веб-страницата за споредување на цените на летовите Momondo ја нуди бесплатната алатка Flight Insight што ги следи најевтините летови. Добро е исто така да се зачлените во клубовите на корисници на авиокомпаниите што најчесто ги користите и да добивате известувања за најдобрите понуди, како и попустите за лојални корисници.
Истражувањата покажале дека цените на картите во просек се поевтини 53 дена пред полетување. Ако купувате карта last minute, избегнувајте да резервирате три дена пред тргнување бидејќи тогаш во просек се најскапи.
Поголемите авиони летаат на поголема висина каде нема налет на ветрови и така сте „посигурни“ ако ве плаши турбуленција. Друга опција е да резервирате карти за седишта до крилата на авионот што се сметаат за најстабилни. Ако сакате да се наспиете, држете се до средината на авионот. Така нема да ве разбуди турбуленција и нема да ја слушате вревата од редицата за во веце. Ако сакате повеќе простор за нозете, проверувајте ги сајтовите Seat Expert и Seat Guru кои помагаат во наоѓање најудобни седишта. За секој случај, резервирајте седиште до ходникот. Можеби ќе ви досадуваат стјуардесите и луѓето, но ќе има кај да испружите нога.
