Комбинацијата од краставици, домати, сол, бибер и малку масло многумина ја сметаат за идеална пролетна салата, но оваа комбинација на состојки сè повеќе предизвикува дебата меѓу нутриционистите.
Според руската нутриционистка Алена Парецкаја, иако и доматите и краставиците се богати со хранливи материи, нивната комбинација во салата може да има и негативни ефекти.
Имено, доматите се богати со аскорбинска киселина, витамин Ц, додека краставиците го содржат ензимот аскорбиназа, кој го разградува овој витамин и ја намалува неговата ефикасност. На овој начин, според нутриционистката, дел од корисните состојки се губат при заедничо консумирање.
Дополнително, поради високата содржина на вода во краставиците и киселоста на доматите, оваа комбинација може да предизвика надуеност и непријатност во дигестивниот тракт, особено кај луѓе со чувствителни црева. Во некои случаи, ова може да доведе до дијареја.
Покрај тоа, краставицата создава алкална, а доматот кисела средина во желудникот, што доведува до неутрализација на корисните хранливи материи во обете намирници.
Повременото уживање во оваа салата нема да ви наштети, но ако имате чувствителен стомак или проблеми со варењето, се препорачува да ги консумирате овие намирници одделно.
