„Мајчин бакнеж“ е едноставен трик што секој родител треба да го знае.
Од чиста љубопитност, малите деца можат да направат разни белји, како на пример да си пикнат разни предмети во носот. Во такви ситуации, „мајчиниот бакнеж“ може да го спаси денот.
Ники Јуркац, медицинска сестра и мајка на две деца чиј Instagram профил Tiny Hearts Education станува сè попопуларен поради корисните совети за родителите, објави видео во кое се гледа како му помага на нејзиниот син кога се најде во ваква, навидум, безнадежна ситуација.
„Волфи синоќа си заглави грашок во носот. Испаничив на две секунди, а потоа се сетив на една техника со која може да се исфрли заглавен предмет во носот“, вели Ники.
Треба да ја затнете со прст спротивната ноздра од таа во која е заглавен предметот и да ја ставите устата врз отворената уста на детето. Така ќе создадете вакуум. Потоа силно дувнете низ уста додека не почувствувате отпор. Продолжете да дувате во устата на бебето и заглавениот предмет буквално ќе излета од ноздрата во која заглавил.
„Кажете им на сите. Ова нѐ спаси од одење до Брза помош синоќа“, заклучи таа.
„Мајчин бакнеж“ е техника што може да помогне во 60 проценти од ваквите случаи.