Македонското малцинство во Бугарија, односно во Пиринска Македонија, ги осуди непринципиелните компромиси кои власта во државава ги прави кон Бугарија и побара Софија да престане со негирање и асимилација.
Здруженијата на Македонците од Пиринскиот крај, ја искористија годишнината од Кресненското востание за да побараат официјална Софија да престане со политиката на дискриминација, асимилација и негирање на Македонците.
„Ја осудуваме политиката водена од Република Бугарија против Република Македонија, поставувањето на иритирачки услови пред нејзиното членство во ЕУ, а имено да се откаже од идентитетот на македонската нација, јазикот, историјата и да се одрече од македонското малцинство во Бугарија“, стои во Декларација на македонски здруженија во Бугарија.
Во изјава за Канал 5, Стојко Стојков од ОМО Илинден – Пирин вели дека на ваков чекор се решиле бидејќи според нив ситуацијата меѓу двете држави се влошува. На бугарските барања вели дека треба да се возврати со реципроцитет. Не очекува искрени намери од Бугарија, сѐ додека Софија не спроведе вистински попис во кој би имало и графа Македонци.
Барањето Македонија да се откаже македонско малцинство во Бугарија е една од точките 5+1 кои беа наведени по самитот во Словенија, на кој на маса беше и деблокадата на македонските евроинтеграции.
