Предводени од знаменосецот Дејан Георгиевски и веднаш до него Арбреша Реџепи, на „Националниот стадион“ во Токио, попладнево зачекорија македонските натпреварувачи кои ќе ја претставуваат нашата земја на Олимписките игри 2020.
Македонската експедиција на свеченото отворање се појави како 50-та, а делегациите излегуваа според имињата на државите на јапонски.
Први од македонските спортисти ќе настапат Филип Деркоски (пливање – 400 м.) и Борјан Бранковски, спортско стрелаштво 10 м. воздушен пиштол кои на Олимписките игри ќе се натпреваруваат утре.
Реџепи (џудо – 52 кг) ќе настапи на 25 јули, а истиот ден ќе се одржат и борбите за медал во нејзината категорија.
Георгиевски (теквондо) во категоријата +80 кг ќе настапи на 27 јули, а истиот ден ќе се одржат и борбите за медал во неговата категорија.
Миа Блажевска-Еминова ќе настапи на трката на 100 м. (пливање) на 28 јули.
Јован Стојоски (атлетика) во трката на 400 м. ќе настапи на 1 август, а финалето на оваа трка е на 2 август.
Пуликсена Јованоска (карате, кати) ќе настапи на 5 август, а истиот ден ќе се одржат и борбите за медал.
Последен на Олимписките игри ќе настапи Нуров Магомедгаџи (борење слободен стил, 97 кг). Неговите борби во осминафиналето започнуваат на 6 август, а следниот ден ќе се одржат и борбите за медал во оваа категорија.