Шампионот на македонската женска фудбалска лига, тетовски Љуботен, уште во првото коло во квалификациите за Лигата на шампионите доживеа тежок дебакл, губејќи со 10:0 од исландскиот шампион Валур.
Дека Македонките ги чека понижување покажаа воведните неколку минути. Исланѓанките уште во 2. минута го отворија резултатот, а во 5-тата веќе го дуплираа водството. До 20-тата минута Љуботен веќе губеше со убедливи 4:0, а на полувреме замина со петарда во својата мрежа.
Во вториот дел Исланѓанките не застанаа, напротив, со нова петарда се изборија за двоцифрена победа од 10:0 и вистинско понижување за македонските шампионки.
Натпреварот се играше на неутрален терен во Холандија.
Стадион „Спортпарк“ во Енсхеде (Холандија)
Валур - Љуботен 10:0 (5:0)
Стрелци: 2', 63' Јасмин Ингадотир, 5' Рагнхејдур Торун Јонсдотир, 13' Наташа Анаси, 18' Берглинд Агустсдотир, 35' Ана Петурсдотир, 51', 52', 81' Исабела Тригвадотир, 71' Берглинд Торвалдсдотир
За Љуботен настапија: 1. Карен Алехандра Родригес Еспиноса (68' 27. Мила Павловска); 69. Христина Јошевска, 6. Нина Миленковиќ, 5. Александра Јовановска (46' 15. Росана Китановска), 2. Ива Јованоска; 99. Хава Мустафа, 20. Паула Александра Валбуена Новоа, 8. Александра Марковска (к) (63' 7. Данче Карпузовска); 11. Настасја Накова (78' 17. Андреа Коловска), 21. Ингрид Видал (46' 9. Елена Симјонова), 22. Бојана Петкова.
Главен судија: Ловиса Јохансон (Шведска)
Валур сега ќе игра со победникот од дуелот Твенте - Кардиф Сити. За Љуботен не е крај, бидејќи со цел развој на женскиот фудбал УЕФА предвидува дуел на поразените од секој турнир. Македонскиот тим ќе игра на 7 септември против поразениот од истиот дуел, Твенте - Кардиф Сити. Победниците на 11-те турнири ќе одат во 2. коло.
Љуботен веќе трета година по ред е најдобрата екипа во Македонија, во чие првенство често победува со двоцифрен број на голови. Во составот има и странски играчи, и тоа 4 Колумбијки и Србинка.
Денешниот резултат само покажува колку е неквалитетен македонскиот женски фудбал, кога екипата што жари и пали дома е топовско месо на меѓународната сцена.
