Словенечкиот НБА ас Лука Дончиќ го повлече барањето испратено до Канцеларијата за патенти и поштенски марки во САД и со тоа ја заврши правната битка со неговата мајка Мирјам Потербин, која на тој начин остана сопственик на правата на неговиот бренд.
Дончиќ сакал да го регистрира својот бренд под името „Лука Дончиќ“, но регистрациската канцеларија одбила бидејќи веќе постои бренд „Лука Дончиќ 7“ кој неговата мајка не сакала да го откаже.
Во тужбата изјавил дека не се поврзува со тој бренд и не одобрува ставање на производи и услуги на пазарот под тоа име.
Исто така, Словенецот во тужбата навел дека бил премлад кога го регистрирал брендот и не знаел што да прави, па сѐ ѝ препуштил на мајка си, потпишувајќи ги потребните документи.
Мирјам го презеде управувањето со брендот на нејзиниот син во сезоната 2018/19, односно кога тој штотуку пристигна во НБА лигата.
„Продолжувам да растам како играч и како личност, па затоа ми е важно да го контролирам мојот сопствен бренд“, рече Дончиќ во моментот кога ја поднесе тужбата.
Да потсетиме, Лука пред нешто повеќе од една година потпиша петгодишен договор со Далас Маверикс од кој ќе заработи 207 милиони евра.