Вработените во клубот ќе бидат на принуден одмор, но богатиот клуб нема да земе ниту фунта државна помош туку платите во целост ќе им ги исплаќа од сопствен џеб.
Британската влада одлучи да им помогне и на богатите премиерлигаши, а Ливерпул, Тотенхем, Њукасл, Борнмут и Норвич радо ја прифатија оваа помош. Манчестер Сити одлучи дека има доволно пари за да се справи со финансиската криза, сите вработени ќе ги добијат платите 100 посто, а за тоа „Граѓаните“ нема да земат ниту фунта помош.
Омар Берада, кој е главен оперативен директор на клубот од Манчестер, ја потврди одлуката на управата која ја пренесе клупскиот потпарол.
„По одлуката на управата минатата недела, потврдуваме дека Манчестер Сити нема да ги користи мерките на британската Влада за финансиска помош на персоналот поради коронавирусот“, откри портпаролот на клубот.
„Остануваме посветени на заштитата на нашите луѓе, нивните работни места и нашиот бизнис, а во исто време правиме сѐ што можеме за да ја поддржиме нашата заедница во овој доста тежок период“, додаде тој.
Британската Влада покрива 80% од трошоците на вработените во клубовите, изземајќи ги играчите, а клубовите кои веднаш ги прифатија овие мерки доживеаја јавна осуда.