Капитенот на Бразил, Маркињос, им се извини на навивачите за поразот од Аргентина (1:4) во 14. коло од јужноамериканските квалификации за Светското првенство, што во 2026 година ќе се одржи во Канада, САД и Мексико.
Аргентина е на првото место на табелата со 31 бод и обезбеди пласман на Мундијалот на четири кола до крајот на квалификациите. Бразил е на четвртото место со 21 бод, колку што имаат и Уругвај и Парагвај.
„Тоа што го направивме не смее да се повтори. Тешко ми е да зборувам бидејќи сè уште сме под импресии… Штета. Натпреварот го започнавме многу лошо, далеку под тоа што можеме, а тие беа полни со самодоверба. Знаеја да играат паметно… Им се извинувам на нашите навивачи“, изјави Маркињос, пренесуваат бразилските медиуми.
Селекторот на Бразил, Доривал Жуниор, има само 7 победи од 16 натпревари со националниот тим. Тој ја презеде репрезентацијата на Бразил во јануари 2024 година.
„Не постои тајна формула во фудбалот каде се донесува одлука и сѐ се извршува како што треба. Сите можеме да играме подобро. Мораме да ја споделиме вината“, истакна Маркињос.
Бразил во следното коло од квалификациите за Светското првенство во 2026 година ќе игра против Еквадор.
