Повеќе од 30.000 навивачи на Интер на плоштадот Дуомо бучно ја прославија првата шампионската титула на клубот, по пауза од 11 години.
Навивачката прослава почна спонтано откако второпласираната Аталанта ремизираше на гостувањето кај Сасуоло (1:1) што на Интер му донесе недостижни 13 бодови предност на четири кола пред крајот на италијанското првенство.
И покрај забраната за групни собирања и мерките за социјална дистанца, илјадници навивачи на Интер со „сино – црни“ знамиња, димни бомби и пеење навивачки песни го „окупираа“ плоштадот пред миланската катедрала.
-Ова е ослободување по едногодишно страдање, изјави еден навивач на Интер, додека друг додаде „денеска ја славиме титулата, утре ќе размислуваме за вирусот“.
Играчите на Интер титулата ја прославија на социјалните мрежи.
-Сонот стана стварност, напиша Ромелу Лукаку, кој на Instagram објави видео како вози низ градот со развиорено клупско знаме.
Творецот на шампионскиот Интер, Антонио Конте, рече дека ова е еден од најголемите успеси во неговата тренерска кариера.
-Среќни сме поради сите овие луѓе кои работеа Интер да ја освои титулата. Ова е еден од најважните успеси во мојата кариера, изјави Конте.