Масовна тепачка во дербито на Москва

Фудбалерите на Спартак, во градското дерби на гостински терен славеа против ЦСКА со 2:0 во 14. коло од руската Премиер лига, а натпреварот го одбележа масовна тепачка меѓу фудбалерите.

Спартак поведе во последната минута од првото полувреме кога Бонгонда по асистенција на Пруцев постигна гол.

Гостите со таа предност заминаа на одмор, а потоа на почетокот на вториот дел, во 52. минута од натпреварот настана тотален хаос на теренот. Фудбалерот на ЦСКА, Бразилецот Вилиан Роша, ги удри дефанзивците на Спартак, Руслан Литвинов и Срѓан Бабиќ, и му ја раскрвари усната на српскиот фудбалер.

Поради тој инцидент исклучени беа Роша и Литвинов, а пожолтеа Бабиќ и Наил Умјаров од Спартак. При крајот на натпреварот фудбалерот на ЦСКА, Иван Обљаков, доби втор жолт картон.

Точка на натпреварот стави Парагваецот Хесус Медина во 9. минута од надополнувањето.