Матс Хумелс летна за Италија: Следува потпис со Рома

Гигантот од Рим практично ја заврши работата околу ангажирањето на германскиот дефанзивец Матс Хумелс, па тренерот на овој клуб, Даниеле Де Роси, ќе добие големо засилување во тековната сезона.

Хумелс моментално е без ангажман, бидејќи договорот со Борусија од Дортмунд му истече на крајот од минатата сезона, а сѐ уште нема намера да ја заврши кариерата иако веќе има 35 години.

Италијанските медиуми пренесуваат дека се водат преговори меѓу претставници на Рома и Хумелс, кој наводно од римскиот клуб бара плата од 2,5 милиони евра по сезона. Германецот е на пат кон главниот град на Италија и се очекува овој трансфер да биде комплетиран во следните неколку дена.

Хумелс утринава дури и беше снимен на минхенскиот аеродром како ја чекира картата за Вечниот град, каде веќе слета на аеродромот „Леонардо Да Винчи“ близу Фјумичино.

Дефанзивецот наводно одбил понуди од Баер Леверкузен, Ајакс, Вест Хем, Реал Сосиедад, Спортинг, Болоња, Мајорка, како и неколку клубови од Саудиска Арабија.

Покрај за Борусија Дортмунд, Хуленс играше и за Баерн, а за репрезентацијата на Германија одигра 78 натпревари и постигна 5 гола.

Со Хумелс во одбраната Де Роси ќе има слатки маки да бира меѓу него, Џанлука Манчини, Еван Ндика и Марио Ермосо. Рома летово ја напуштија двајца стопери: прво Мараш Кумбула замина на позајмица во Еспањол, а деновиве Крис Смолинг се пресели во саудискиот Ај Фајха.