Норвешкиот метал бенд „Mayhem“ наместо во октомври гостувањето во Скопје го презакажа за март наредната година.
Македонските љубители на метал музиката ќе почекаат за да го слушаат во живо злогласниот норвешки блек метал бенд „Mayhem“. Норвежаните решија, поради пандемијата со коронавирусот, да ја преместат целата турнеја за 2021 година, не само гостувањето во Скопје.
„Mayhem“ требаше да настапи во МКЦ на 4 октомври заедно со уште еден норвешки блек метал бенд, „Mortiis“. Бидејќи „Mayhem“ во Скопје требаше да дојде како дел од европската турнеја заедно со „Mortiis“, тоа значи дека и настапот на „Mortiis“ е одложен за во март.
„На жал и ова се случи. Турнејата на Mayhem е одложена!
Нова дата за Скопје е 13.03.2021. Тие што имате купено карти, истите ке важат и за новата дата“, стои во официјалното соопштение на организаторот Terrorvoid Promotions.
„2020 европската турнеја е одложена!
Ова е штета, но не е изненадување, ниту пак беше можно да се избегне европската турнеја закажана за оваа есен да се одложи. Ова се неизвесни времиња, благо речено, сепак сите прамиме с што можеме за да го вратиме Mayhem на сцената. Турнејата 2020 е поместена за февруари/март 2021 и најискрено се надеваме дека ова ќе биде доволно. Времето ќе покаже!“, напишаа од „Mayhem“ на својот Facebook профил.
Според новиот календатр „Mayhem“ турнејата ќе ја почнат од родната Норвешка на 26 февруари на локација која допрва треба да ја дефинираат. Заклучно со 5 март ќе настапуваат во Берген, Трондхејм, Осло, Ставангер, Драмен и Хамар, а потоа од 6 март почнуваат со европската турнеја од Шведска каде ќе им се придружи и „Mortiis“.
Потоа следуваат настапи во Германија, Австрија, Словачка, Унгарија. На 12 март ќе свират во романски Брашов и оттаму доаѓаат во Скопје од каде потоа се селат во Солун каде ќе настапат на 15-ти. Турнејата продолжува со втор концерт во Грција и тоа во главниот град Атина, па италијанските Бари, Рим и Парма, фрнациските Одинкур и Париз, па Манчестер, Белфаст, Даблин, Глазгов, Бристол и Лондон во Обединетото Кралство, па Белгија, германски Оберхаузен, Холандија, Хамбург, дански Архус и турнејата ја завршуваат на домашниот Inferno Festival.