Три сезони со ред Мбапе е најдобар стрелец во француската лига, но од сезонава има огромна конкуренција во Лео Меси и тоа токму во неговиот тим.
Килјан Мбапе царува во Лиг 1 веќе три сезони. Прв пат титулата најдобар стрелец ја освои во сезоната 2018/19 кога погоди 33 пати, наредната ја подели со Висам Бен Једер од Монако откако и двајцата постигнаа по 18, но тогаш сезоната се прекина поради пандемијата, додека мнинатата сезона со 27 гола повторно беше најдобар.
Но, сега во Лиг 1 игра и Лео Меси, кој во Ла Лига дури 8 сезони ја освојуваше наградата за најдобар стрелец, а тоа му успеа и во минатите пет сезони по ред.
„Тој ќе мора да се адаптира на новата ситуација. Но, со Меси крај него ќе напредува уште повеќе. Доколку има интелигенција да се движи добро и да го искористува просторот кој Меси и Нејмар ќе го создаваат, често ќе се наоѓа во добри ситуации благодарение на нивната способност за проигрување, и со тоа ќе постигнува и многу голови“, вели поранешниот голгетер на ПСЖ, Португалецот Педру Паулета.
„Фактот што тој може да игра на било која страна, како и на средината, му е тајно оружје. Но, со тоа доаѓа и ризикот дека секогаш некој од нив тројца ќе постигнува помалку голови. Доколку тоа е случај со Килјан, ќе мора да го прифати тоа“, додава тој.
ПСЖ сезонава ќе има фатастичен напад предводен од триото Меси, Нејмар и Мбапе, додека од клупата шанса ќе чека Мауро Икарди.