Мекензи Скот, поранешната сопруга на Џеф Безос, соопшти дека има донирано 1,7 милијарди долари во добротворни цели по разводот од шефот на Amazon.
Таа има дадено донации на групи за борба против климатски промени, здравствени организации и колеџи во кои историски се поттикнувало примањето на студенти Афроамериканци.
Поранешната сопруга на најбогатиот човек во светот го соопшти ова преку социјалните мрежи и додаде дека и легално го сменила презимето од Безос во Скот. Таа и Безос се разведоа лани.
Писателката која се омажи за бизнисменот една година пред тој да го основа Amazon и која била една од првите вработени во компанијата, доби удел од 4% во технолошката компанија по разводот.
Набрзо по разводот, Скот го потпиша ветувањето Giving Pledge со што се приклучи кон кампањата на милијардерите Ворен Бафет и Бил и Мелинда Гејтс, во која богатите се обврзуваат да го дадат поголемиот дел од нивното богатство во добротворни цели.
Скот во блог објава напиша дека ја набљудувала првата половина од 2020 година со измешани чувства на ужаснатост и тага и тоа само мотивирало да ја продолжи хуманитарната работа.
Таа има донирано над 586 милиони долари на организации кои се борат против расна неправда и 399,5 милиони долари за унапредување на економската мобилност. Други каузи на кои помогнала финансиски се родовата еднаквост, глобалниот развој и ЛГБТК еднаквост.