Изминатиот викенд британскиот боксер Тајсон Фјури ја задржа титулата на светски шампион во WBC откако во 11 рунда го нокаутира Дионтеј Вајлдер и ја испиша втората победа против него.
Мечот предизвика огромно внимание во светот, а меѓу оние кои активно ја следеа борбата и ја коментираа е еден од најпопуларните ММА борачи, Конор Мекгрегор.
„Врвна борба, и едниот и другиот е победник. Тешко е човек да не биде импресиониран со Дионтеј, се бореше против многу поголем човек од него и за малку ќе победеше. Одличен меч. Разликата во тежина од 18 килограми е многу голема. Секоја чест на обајцата, уживавме во нивните борби. Респект“, напиша Ирецот на Twitter.
Тој смета дека нивните вештини се уникатни, но скоро еднакви.
„Многу сакам кога двајца чесно ќе настапат, а не како некои кои слават победа откако противникот ќе доживее ужасна повреда. Знаете на што мислам. Боже, благослови ги оние искрените во овој свет“, додаде тој.
Мекгрегор мисли на неговиот противник Дастин Поарје. Американскиот борач го победи Ирецот откако Мекгрегор се здоби со тешка повреда на ногата. Досега се имаат трипати соочено, а Поарје води со 2 : 1.
Во тек се преговори за четврта средба.