Првата дама на САД, Меланија Трамп, која наскоро ќе ја напушти Белата куќа, со порака се обрати до американската нација.
Таа вели дека најголемата чест во нејзиниот живот е што била прва дама на САД.
„Ме инспирираа неверојатните Американци ширум земјата кои ги градеа нашите заедници со својата љубезност и храброст, со добрина и грациозност. Изминатите четири години беа незаборавни. Сега кога Доналд и јас го завршуваме времето во Белата куќа, мислам на сите луѓе што ги примив во моето срце и на нивните неверојатни приказни за љубов, патриотизам и решителност“, напиша Меланија Трамп во писмото.
Во пораката, Меланија им се заблагодари на сите медицински сестри, лекари, здравствени работници и други луѓе кои работат на спасувањето животи и им изрази сочувство на семејствата кои ги загубија своите најмили поради пандемијата на коронавирусот.
„Секој живот е драгоцен и ги замолувам сите Американци да бидат претпазливи и со здрав разум за да ги заштитат ризичните, бидејќи сега се доставуваат милиони вакцини“, се додава во пораката на првата дама.
Меланија,исто така, наведе дека нејзината страст за помагање била двигателот за нејзината политичка иницијатива како прва дама.
„Ја почнав иницијативата „Биди најдобар“ за да се осигурам дека ние Американците правиме сè што е во нашата моќ да се грижиме за следната генерација. „Биди најдобар“ се фокусираше на три столба: благосостојба, безбедност на интернетот и злоупотреба на опоидите“, напиша првата дама за нејзината иницијатива.
Збогувајќи се, таа му се заблагодари на американскиот народ и напиша дека зборовите не можат да ја изразат длабочината на нејзината благодарност за привилегијата да биде прва дама на САД.