Ултраспортскиот Mercedes-AMG One, кој повторно го возеше тркачот Маро Енгел, помина низ „зелениот пекол“ за 6 минути и 29,09 секунди, што е нов рекорд на кругот во категоријата на автомобили што можат да се користат (и) на јавни патишта.
Спектакуларната „Формула 1 за двајца“ на AMG за прв пат се сретна со познатата германска патека „Нирбургринг Нордшлајфе“ на крајот на октомври 2022 година, кога тркачот на Мерцедес, Маро Енгел, во сериското издание на ултра спортскиот автомобил AMG One ја „затвори“ патеката за 6 минути и 35,18 секунди, што е рекордно време во категоријата автомобили што може да се купат и користат на јавни патишта.
Две години подоцна, црвениот AMG One возен повторно од Енгел низ „зелениот пекол“ во најдолгото издание (20,83 километри) мина за 6 минути и 29,09 секунди, што (со значително подобро време од претходниот рекорд) му ја обезбеди и титулата прв сериски автомобил кој ја „затворил“ патеката за помалку од 6 минути и 30 секунди.
Рекордното време на сува патека Енгел го достигна во третиот круг нешто пред 19 часот, а останува прашањето кој би можел да го загрози времето постигнато на тимот на Mercedes-AMG во иднина. Се споменуваат моделот Valkyrie на Aston Martin, McLaren W1 кој треба да пристигне следната година, наследникот на моделот LaFerrari на Ferrari, Rimac Nevera R, Porsche Mission X... Ракавицата е фрлена.
За потсетување, Mercedes-AMG One е придвижуван од „plug-in“ хибридна комбинација составена од централно поставен 1,6-литарски V6 мотор „позајмен“ од Формула 1 на Mercedes и 4 електромотори. Комбинираните 1.063 КС се доволни за електронски ограничени 352 км/ч и забрзување од 0 до 100 км/ч за 2,9 секунди.
