Мерилин Менсон беше во затвор од 2 јули откако се предаде на полицијата во Лос Анџелес. По него беше распишана потерница за бидејќи наводно нападнал и плукнал снимател на концерт во 2019 година во Њу Хемпшир.
Рокерот, чие вистинско име е Брајан Ворнер, е обвинет по две прекршочни точки поврзани со инцидентот од 18 август 2019 година во амфитеатарот во Гилфорд. Податоците од полицијата во округот Лос Анџелес покажуваат дека Менсон бил притворен во затворот во Лос Анџелес на 2 јули.
Ентони Бурпи, началник на полицијата во Гилфорд, вчера им потврди на американските медиуми дека рокерот им се предал на властите, и дека Менсон бил процесуиран и ослободен со кауција.
„Задоволни сме од одлуката на г-дин Ворнер конечно да одговори на потерницата издадена во 2019 година“, рече Бурпи.
Во мај, откако полицијата издаде налог за апсење, адвокатот на Менсон за ТВ-станицата NBC10 во Бостон изјави дека обвинението за напад врз снимателот е „смешно“.
„Секој што присуствувал на концертот на Мерилин Менсон знае дека тој сака да биде провокативен на сцената, особено пред камерите. Ова прекршочно обвинение е поднесено откако добивме барање од снимателот да платиме 35.000 долари, бидејќи мала количина плунка му паднала на рака. Откако побаравме докази за наводната штета, никогаш не добивме одговор“, рече адвокатот, додавајќи:
„Целото ова тврдење е смешно, но ние ќе продолжиме да соработуваме со властите, како што сторивме досега.
52-годишниот музичар би требало да има судење во Њу Хемпшир, но датумот сè уште не е објавен. Доколку биде осуден, музичарот се соочува со можна максимална казна од една година затвор и парична казна од 2.000 американски долари.