Лионел Меси на почетокот на сезоната побара трансфер од Барселона, но каталонскиот клуб одби да го продаде, па Аргентинецот мораше да остане на Камп Ноу.
Барселона се надеваше дека најдобриот фудбалер на светот ќе се премисли, но се чини дека тој сè уште не се откажува од идејата за промена на клубот.
Даниел Риоло, новинар на RMC Sport, синоќа сензационално објави дека Меси ќе потпише за ПСЖ.
„Меси ќе игра за ПСЖ следната година. Да, многу сум сериозен кога го кажувам тоа. Меси ќе биде играч на ПСЖ", тврди Риоло, кој има околу половина милион следбеници на Twitter.
Информацијата стигна само еден ден откако Нејмар, најголемата ѕвезда на ПСЖ изјави дека следната сезона мора да игра со Меси, со кого четири години делеше соблекувална во Барселона.
„Во моментов најмногу што сакам е да играм со Меси повторно. Сакам да играм со него. Ако тој сака, ќе му ја оставам и мојата позиција. Следната сезона мора да играме заедно, тоа е сигурно".
Со оглед на тоа дека Барса е во голема финансиска криза, јасно е дека Нејмар нема да се врати таму, па единствената опција да игра со Меси е ако Аргентинецот дојде во Париз.