IT гигантот подготвува уште едно големо преземање за само неколку месеци.
До крајот на оваа година ќе ја купи компанијата за препознавање говор Nuance Communications за околу 16 милијарди долари, односно околу 19 милијарди долари, вклучувајќи ги долговите.
Nuance генерира приходи со продажба на алатки за идентификување и препознавање говор при посети на лекар, повици во служби за услуги на клиенти и говорна пошта. Microsoft соопшти дека технологијата на Nuance ќе се користи за проширување на Cloud производите за здравствена заштита на Microsoft, лансирани минатата година.
Спојувањето со Nuance претставува најголема аквизиција на Microsoft откако компанијата на Бил Гејтс го купи LinkedIn во 2016 година за повеќе од 26 милијарди долари. Минатиот месец, Microsoft ја заврши аквизицијата на Zenimax за 7,6 милијарди долари. Компанијата, исто така, наводно е во преговори за купување на chat апликацијата Discord за околу 10 милијарди долари, а исто така Microsoft лани се обиде да го купи TikTok за околу 30 милијарди долари, но тој договор пропадна.
Апликациите на компанијата Nuance може да се најдат во телевизорите на Samsung и автомобилите BMW.
Извршниот директор на Microsoft, Сатиа Надела, ги истакна алатките на Nuance што се користат во здравството како клучна причина за купувањето.
„Видовме големо забрзување во дигиталната трансформација, особено во здравството“, рече Надела.
Microsoft соопшти дека раководството на компанијата нема да се промени и дека работењето на компанијата ќе го надгледува раководителот на секторот во Microsoft задолжен за Cloud и вештачката интелигенција. Иако Microsoft веќе има вградено препознавање на глас во многу свои производи, неодамна исклучи од понудата некои производи со дигиталниот асистент Cortana, а бидејќи Nuance има добра репутација за технологијата за препознавање глас и се смета за потенцијална цел за компании како Apple, дополнителната експертиза во оваа област ќе им помогне на тимовите на Microsoft.