Селекторот на македонската фудбалска репрезентација, Благоја Милевски, на денешната прес-конференција го соопшти списокот со повикани играчи за јунските ЕУРО квалификациски натпревари против Украина и Англија.
Милевски повика 29 играчи кои треба да му се стават на располагање за двата дуела. Од мартовскиот список има мали измени, а единствено ново име е играчот од дефанзивната средина на дански Сендерјиске, Сефер Емини.
Поради повреда недостасува напаѓачот Бојан Миовски, кој сезонава постигна 16 гола во шкотската лига. Поради мала минутажа не се повикани Кире Ристевски, Стефан Спировски и Бобан Николов, а Дарко Чурлинов од новиот англиски премиерлигаш Барнли поради болест. Има и смена кај резервните голмани каде Дејан Илиев се врати на местото на ветеранот Кристијан Наумовски. Изненадува тоа што меѓу голманите го нема Ведран Ќосевски, кој сезонава беше најдобар голман во домашната лига со само 13 примени голови.
Голмани:
Столе Димитриевски - Рајо Ваљекано (Шпанија)
Дамјан Шишковски - Докса (Кипар)
Дејан Илиев - ХЈК (Финска)
Игор Алексовски - Работнички
Одбрана:
Висар Муслиу - Инголштат 04 (Германија)
Ѓоко Зајков - У Крајова (Романија)
Дарко Велковски - Ал Етифак (Саудиска Арабија)
Стефан Ристовски - Динамо (Хрватска)
Езѓан Алиоски - Фенербахче (Турција)
Егзон Бејтулаи - Шкендија
Никола Серафимов - Фехервар (Унгарија)
Владица Брдаровски - Шкупи
Бојан Димоски - Академија Пандев
Јован Манев - Адана Демирспор (Турција)
Средина:
Енис Барди - Трабзонспор (Турција)
Елиф Елмас - Наполи (Италија)
Аријан Адеми - Бејџин Гуоан (Кина)
Јани Атанасов - Краковија (Полска)
Агон Елези - Вараждин (Хрватска)
Давид Бабунски - Мезекевешд (Унгарија)
Давор Здравковски - АЕЛ (Кипар)
Сефер Емини - Сендерјиске (Данска)
Напад:
Александар Трајковски - Ал Фајха (Саудиска Арабија)
Милан Ристовски - Спартак (Словачка)
Дориан Бабунски - Дебрецен (Унгарија)
Валон Етеми - Истанбулспор (Турција)
Илија Несторовски - Удинезе (Италија)
Љупчо Дориев - Шкендија
Стефан Ашковски - Ламија (Грција)
Собирот на „Рисовите“ е на 10 јуни во хотелот „Хилтон“.
Македонија прво 16 јуни ќе ја пречека Украина на Националната арена „Тодор Проески“ во Скопје од 20:45 часот, а во истиот термин на 19-ти ќе ѝ гостува на големата Англија на „Олд Трафорд“ во Манчестер.
По мартовски две кола кога се отворија квалификациите, Македонија има една победа (2:1 над Малта), а едно коло беше слободна.
