Додека расте бројот на заразени со коронавирус низ светот, милиони луѓе се соочени со нови рестрикции.
Владите на повеќе земји повторно воведоа мерки за ограничување на новиот бран на ширење на коронавирусот, додека бројот на заразени е над 13,2 милиони. Повеќе од 576.000 луѓе починаа од последици на COVID-19.
Некои земји, кои претходно успешно се справија со епидемијата, сега повторно воведуваат рестрикции поради зголемениот број на заразени.
Хонгконг повторно ги затвори кафулињата, теретаните и салоните за убавина. Забрани собири за повеќе од четири лица. Многу жители на Хонгконг доброволно носеа заштитни маски, а сега тие станаа обврска кога станува збор јавниот превоз.
Индиската држава Бихар, со 125 милиони жители, прогласи 15-дневен карантин кој почнува од утре.
Австралиските власти повикаа на одржување социјална дистанца, додека околу 5 милиони жители на Мелбурн уште од минатата недела се во изолација од остатокот од земјата за да се запре заразата во тој дел.
САД се најпогодена земја. Секојдневно има десетици илјади новозаразени, а државните и локалните власти повторно воведуваат мерки кои претходно беа укинати.
Американците имаат надеж во најавата на компанијата Moderna за вакцина против COVID-19. Станува збор за трета, клучна фаза во испитувања на вакцината mRNA-1273. Американската влада во овој проект вложи скоро половина милијарда долари.
Завршните клинички испитувања ќе се спроведат на 87 локации во САД и ќе бидат вклучени 30.000 возрасни луѓе кои имаат големи шанси да се заразат со вирусот. Експерименталната вакцина ќе биде тестирана во 30 сојузни држави.
Американскиот епидемиолог Ентони Фаучи првите резултати од вакцината ги смета за охрабрувачки.