Тимот на Милвоки Бакс дојде до втората победа и пресврт во полуфиналната пресметка со Атланта Хокс совладувајќи ја со 113:102.
Во „Стејт Фарм“ арената во Атланта домашните кошаркари подобро играа на стартот и првата четвртина ја решија во своја корист со 32:27, иако во одреден момент водеа дури и со 15 поени (25:10). Сепак, Милвоки се врати во игра, заигра подобро, влезе во серија и на полувреме се замина со нерешен резултат (56:56).
Атланта повторно беше подобриот тим на почетокот од третата четвртина, но не успеа да направи поголема разлика и во последната четвртина влезе со водство од само два поена разлика (85:83).
Победникот беше решен во самиот финиш кога Милвоки заигра сјајно и при резултат од 98:98 направи серија од 15:4 за на крајот со двоцифрена разлика да ја зграпчи победата.
Најдобар поединец на натпреварот во победничкиот табор беше Крис Мидлтон кој уфрли 38 поени со 11 скокови и 7 асистенции. Сличен скор имаше и Јанис Адетокумбо со 33 поени и 11 скокови, додека кај домаќините се истакна Тре Јанг со 35 поени.
Со ова победа Милвоки сега води 2-1 во серијата подобар од 7. Наредниот натпревар се игра во среда сабајле од 2:30 часот, а повторно домаќин е Атланта.
