Убавицата која беше прогласена за Мис Англија во 2019 година се врати во Обединетото Кралство од странство каде работеше на хуманитарни проекти за да продолжи да работи како лекар за време на пандемијата со COVID-19.
Баша Мукерџи направи пауза од докторската кариера откако се натпреваруваше во Изборот за мис на светот во декември, 2019 година. Мукерџи ја претставуваше Англија на изборот откако победи на домашниот избор за убавина.
Таа беше поканета да биде амбасадор на неколку хуманитарни добротворни организации и планираше да се посвети на тоа до август годинава.
„Бев поканета да одам во Африка, потоа Турција, Индија, Пакистан и неколку други азиски земји како амбасадор на неколку добротворни организации“, изјави таа за CNN.
На почетокот на март, 24-годишната мисица беше во Индија како дел од Coventry Mercia Lions Club, добротворна организација за развој и заедници, работејќи на проекти за образование и помош на напуштени девојчиња.
Но, откако ситуацијата со новиот коронавирус во нејзината родна земја се влоши, Мукерџи почнала да добива пораки од поранешните колеги во болницата Pilgrim Hospital во Бостон, источна Англија, кои ѝ кажувале колку е тешка состојбата таму.
Таа за CNN изјави дека почувствувала дека е погрешно да ја носи круната, макар и за хуманитарна работа, додека нејзините колеги напорно работат, а луѓе умираат во епидемијата.
„Сакав да се вратам дома и веднаш да почнам да работам“, рече Мукерџи.
Мис Англија се преселила од Калкута во Дерби, Англија кога имала 9 години.
„Нема подобро време да бидам вистинска Мис Англија и да ѝ помагам на Англија кога ѝ сум потребна“, рече таа.
Сега е во самоизолација по враќањето дома и ќе треба да почека една до две недели пред да може да се врати на работното место во Pilgrim Hospital. Таа има специјализирано на насоката респираторни болести, но рече дека во моментов докторите ги ротираат онаму каде што се најпотребни.
Според најновите податоци, во Велика Битанија има 60.733 потврдени случаи на COVID-19, од кои 7.097 починале.
