Младинскиот културен центар – Скопје излезе со реакција на веста за разрешување на постоечкиот в.д. директор Ванчо Богоев, нагласувајќи дека МКЦ е на мета на партиски игри.
„Во попладневните часови вчера, постоечкиот в.д. директор на МКЦ, Ванчо Богоев кој е 36 години е дел од институцијата и кој со својот едвај целогодишен мандат продолжи во насока на растење и одржување на програмата на МКЦ, беше сменет од својата позиција поради неподлегнување на екстремните притисоци од Генералниот секретар на Град Скопје да потпише вработување за Арбен Шаќири“, стои во соопштението на МКЦ во кое се додава дека бидејќи не била потпишана одлуката за вработување на Шаќири, назначен е нов в.д. директор, Никола Алексов.
Според споделената информација, Алексов е „дипломиран детектив, кој е примен пред два дена преку Агенција за привремени вработувања во МКЦ без никакво искуство и позадина во културна институција“.
Од Програмскиот колегиум на МКЦ понатаму велат:
„И покрај признанието кое дојде како круна на нашето работење со наградата 13 Ноември за заслуги во областа на културата и масовната посетеност, можеби и најголема во историјата на институцијата по повод 50 годишниот јубилеј, годината почна со лоши вести за иднината на МКЦ. Првата е онаа дека буџетот ни е доведен до само 8% од годишниот буџет со кој работевме минатите години, а веднаш потоа и последните случувања во начинот на инсталирање на директор во МКЦ.
Овој допис доаѓа како потреба за разјаснување на ситуацијата која се наметна, истовремено и поради сомнежот во законитоста на овие решенија бидејќи со ова, се одбегнува повотрно можноста да јавно се спроведе отворен конкурс за директор, на кој отворено и транспарентно би можеле да се пријават сите квалификувани професионалци од областа на културата.“