Министерот за надворешни работи Бујар Османи ја пречека министерката за надворешни работи на Словенија, Тања Фајон, со знаме на Република Словачка.
Министерството за надворешни работи денеска преку соопштение до медиумите изрази длабоко извинување за, како што се наведува, „ненамерниот пропуст при употребата на малото знаме на тет-а-тет средбата на двајцата министри при посетата на министерката Фајон на земјава, кое беше едно од десетте државни обележја кои беа употребени за време на средбите“.
„Во исто време дозволете да информираме дека состанокот, како всушност и целата посета на министерката Фајон помина во исклучително позитивна и пријателска атмосфера со важни пораки кои беа разменети и на самите состаноци, но и испратени во јавноста.
Иако не може да има оправдување за направениот пропуст, министерката со целосно разбирање ја прими грешката како ненамерна, без никакво влијание врз успешноста на средбите и посетата.
Информираме дека Министерството за надворешни работи дополнително ќе ги зајакне протоколарните проверки со цел во иднина да не се повтори ваква ситуација“, се наведува во соопштението од МНР.
Ова не е првпат да потфрли протоколот и да се направи ваков гаф при посета на странски функционер. Во 2018 година, при посетата на тогашниот австриски премиер Себастијан Курц, функционерот беше пречекан со знаме на Летонија. На црногорскиот претседател Мило Ѓукановиќ знамето му го свртеа наопаку, а амбасадорот на Франција Тимоние во Охрид го пречекаа со знаме на Холандија.
Твитерџиите, секако, не пропуштија прилика да испукаат сеир.
