Фотографија од минатогодишниот протест во Судан е победник на престижниот фотонатпревар World Press Photo.
Фотографијата „Straight Voice“ е направена од Јапонецот Јасујоши Чиба, фотограф на AFP. Победничката фотографија прикажува демонстратор кој рецитира поезија за време на демонстрации против диктаторот Омар ал-Башир, опкружен од група демонстранти додека го осветлуваат со светла од телефонските уреди.
Според жирито, поетичната фотографија на Чиба ја покажува моќта на младите и на уметноста, пренесе BBC. Токму затоа е прогласена за фотографија на годината, бидејќи ги инспирира луѓето во небезбедни времиња.
Победничката фотографија во категоријата Spot News е направена од Мулугет Ајен од Етиопија и е серија фотографии од авионска несреќа што се случи на 10 март 2019 година при полетување од Адис Абаба, при што починаа 157 луѓе. фотографијата е направена неколку дена по несреќата и прикажува роднини во жалост на починат во несреќата.
Третата победничка фотографија е судирот меѓу полицијата и антивладини демонстранти, направена од Фарук Батиче во Алжир.
Фотографијата од Томек Казор прикажува 15-годишна Ерменка по име Ева која се буди од состојба позната како синдром на резигнација. Овој феномен ги погодува пред сè, децата бегалци. Тие деца, чекајќи азил, занемуваат, стануваат пасивни и одбиваат храна. Штом ситуацијата се промени тие постепено се враќаат во живот.
Повредениот курдски борец кој е лекуван во болница и има посета од девојката која го трга погледот од неговите повреди е фотографија направена од Ивор Прикет. 18-годишниот Ахмед Ибрахим е фотографиран во болница во Хасакех на 20 октомври минатата година.
Саемот на оружје во Абу Даби е еден од најголемите изложбени салони на воена опрема. На фотографијата се гледа трговец на оружје како се подготвува да претстави проектил од минофрлач. Рускиот фотограф Никита Терјошин ја овековечи оваа сцена и ја доби првата награда во категоријата Современа историја.