На предизборен собир во Северна Рајна Вестфалија германската министерка за надворешни работи Аналена Бербок беше гаѓана со јајца од страна на присутни во публиката.
Во текот на собирот, министерката излезе на говорница за да ја поддржи кандидатката на Зелените, Мона Неубаер, кога во еден момент жена од публиката ја гаѓаше со јајце.
Бербок реагираше смирено, вешто го избегна јајцето и продолжи со говорот.
„Може колку сакате да фрлате со јајца“, рече таа и додаде дека нема да дозволи некој да ја уплаши.
За жената која фрли јајце рече дека има право на свое мислење, но не го избрала баш најдобриот начин.
Полицијата подоцна објави дека „јајцето не ја погодило целта“, но против жената е поднесена казнена пријава поради обид за нанесување телесна повреда.