Трката за Големата награда на Аргентина од Mото ГП шампионатот е откажана поради пандемијата на коронавирусот, соопштија организаторите, изразувајќи жалење поради одлуката.
„Пандемијата, логистичките огрничувања и штетата нанесена врз инфраструктурата наложуваат нејзино откажување“, прецизираа организаторите на Големата награда на Аргентина.
По ова откажување, календарот на Мото ГП остана со 18 трки.
До крајот на сезоната преостануваат уште пет трки. Наредниот викенд ќе се вози Големата награда на Сан Марино и Римини, потоа следиваат ГП на Америка, Емилија-Ромања и Алгарве. Викендов на Големата награта на Арагон победи Франческо Бањаја од тимот на Дукати Леново. Втор заврши Марк Маркес, а на подиумот како трет се искачи и Жоан Мир.
Сезоната во Мото ГП шампионатот завршува на 14 ноември со трката во Валенсија.
Освен Аргентина, сезонава беа откажани и трките во Финска, Јапонија, Тајланд, Австралија и Малезија.
Во генералниот пласман моментално води Фабио Куартараро со 214 поени, пред Франческо Бањаја со 161 и Жоан Мир со 157.