По синоќешните доигрувања Мундијалот во Катар ќе биде посиромашен за уште неколку фудбалски ѕвезди и докажани репрезентации.
Желбата на Златан да одигра Мундијал пред пензионирањето сепак нема да се оствари. Ибрахимовиќ синоќа беше на клупата за Шведска и влезе во игра на 10 минути пред крајот кога Полска веќе имаше убедливо водство од 2:0. Ибра не можеше да ѝ помогне на својата Шведска која загуби во финалниот бараж и нема да патува во Катар.
Роберт Левандовски од белата точка во 50. минута и Пјотр Желињски во 72. стрелаа за Полјците кои беа и поодморени со оглед на тоа што во финалето се пласираа откако ФИФА ја исфрли Русија, па во четвртокот играа пријателска со Шкотска.
На Мундијалот нема да го гледаме ниту египетскиот виртуоз Мохамед Салах кој синоќа дури по изведувањето на пенали испадна од актуелниот африкански шампион Сенегал. Сенегалците со голот на Булаје Диа уште во 7. минута ја надокнадија негативата од Каиро, но резултатот остана непроменет не само по 90, туку и по 120 минути игра. Следуваше пенал-рулет во кој „Фараоните“ дури трипати промашија, а прв беше токму Салах, па Сенегал славеше со 3:1.
Ноќеска завршница се одигра и во Јужна Америка каде единствено непознато остана која репрезентрација ќе биде петта и ќе игра интерконтинентален бараж. Во игра беа Перу, Колумбија и Чиле, а Перуанците ја остварија потребната победа над Парагвај (2:0) и ги оставија Колумбијците да се радуваат на пирова победа на гости кај Венецуела (0:1), додека Чиле загуби дома со 0:2 од Уругвај. Џанлука Лападула во 5-тата и Јошимар Јотун во 42. минута беа творци на победата на Перу кој сега за место во Катар во јуни ќе се бори со победникот од Азија, односно Австралија или ОАЕ.
Не успеа до пласман да дојде ниту Ријад Махрез и неговиот Алжир кој дома потфрли против Камерун откако претходно славеше на гости со 1:0. На преполниот стадион во Блида Камерунците поведоа преку капитенот Ерик Максим Шупо-Мотинг, па натпреварот замина во продолженија. Алжир израмни во 118. минута преку Ахмед Туба, а потоа во 4. минута од надополнувањето следуваше студен туш кога Карл Токо Екамби ја затресе домашната мрежа.
Синоќа потфрли и африканскиот колос Нигерија, најредовниот африкански учесник на Мундијалите. Иако важеа за фаворити против Гана, Нигеријците примија гол рано во 10. минута преку Томас Парти, а иако израмнија во 22. минута преку Вилијам Трост-Еконг потоа не постигнаа победнички гол и испаднаа поради правилото за гол на гости (беше 0:0 во Гана).
Синоќа пласман во Катар изборија уште и Мароко и Тунис.