Мундијалот во Катар ќе почне ден порано

Светското фудбалско првенство 2022 во Катар ќе почне на 20 ноември. На овој датум ќе се одржи церемонијата на отворањето, по што ќе се одржи првиот натпревар, објави ФИФА.

Во првиот дуел ќе играат домаќинот Катар и Еквадор.

Првично беше планирано овие две репрезентации својот натпревар да го одиграат на 21 ноември, но беше одлучено овој натпревар да се премести еден ден порано.

Со оваа одлука Светската фудбалска федерација ја запазува традицијата, домашната репрезентација да биде учесник на првиот натпревар на првенството.

Информацијата дека ФИФА планира да го прифати барањето на Катар наиде на жесток револт кај фудбалската јавност, особено меѓу навивачите на Еквадор. Имено, овие навивачи доаѓаат од далечна земја и повеќето веќе имаат купено авионски билети и смештај со план дека нивната репрезентација игра на 21, а не на 20 ноември.

Мундијалот во Катар ќе трае до 18 декември за кога е закажано големото финале.